Кӧснуналэ ортчем удмурт ужрадъёс сярысь

Кӧснуналэ мон кык параосам кызьы но озьы пукыны чидай ик. Нош 15:00 часын “Палэзянэ” мыноно кариськи. Куазен соку удалтӥз ик, озьы ке но лымы шунамен сюресъёс туж уродэсь луизы, кот, волег, ярам ини мынэсьтым умой мылкыдме со сокем ӧз куашкаты, бурдъяськыса кадь вуи Удмурт театре. Концерт тани-тани кутскыны кулэ ни вал, кызьы но озьы вуттӥ ик азяз. Валамон ни вал ӝытэз одно ик театрысь актёръёс нуозы шуыса, нош кинъёс - соиз тодмотэм вал. Сцена вылэ потэмзы бере гинэ, адӟи Надя Наговицынаез но Котков Лёшаез. Мыным но тросэзлы мукетъёсызлы ӧз кельшы нуэмзы, зэмзэ но, бумага вылысь ваньзы лыдӟыны быгато, кыӵе ке импровизацизы уг тырмы. Вань концертэз мон ӧй учкы, угось дыръя Филармоние “Выль куара” ӵошатсконэ ӧй ни вуттысал. Соин ”Палэзян” сярысь быгатӥсько вераны тазэ гинэ, шумпотӥ тодмо ини поръёсты, вепсъёсты адӟемелы, угось ми соосын ӵош Эшъяськон юртын “Палэзян корка Плюс” ужрадын пӧртэм эктонъёс эктӥм вал. Озьы ик шумпотӥ “Берекет” группаез нош ик кылэмелы, кемалась соосты ӧй ни адӟылы вал, синмаськи “Ерпечкаослы”, Артемий Гавриловлэн но Валерия Фёдоровалэн куараоссылы. Час туж чаляк ортчиз кадь, кыкетӥ рядын пуки бере, возьытгес ик вал ваньзы азьын султыса кошкыны. Тунсыко вал соиз, куке дӥськутме басьтыны мыныкум, сьӧрам ик эшшо кӧня ке кышномуртъёс потӥзы на, озьы ик, пе, “Выль куарае” вуттыны турттӥськом на. Тумошо та палэнысен адске, туж. Шедьтӥм амал сойзэ но тайзэ адӟыны, нимаське) Нош сюрес эшшо сыӵе урод на, котькытын ву пуке, волег. Ярам, вуттӥм ик “Выль куарае” лыктыса. Татын но ужрадэз нуисьёссы Удмурт театрысь вал: со Марина Самсонова но Сергей Наговицын, кудъёсызлэн нуэмзы озьы ик туж ик ӧз кельшы, котя мон соосты ушъяй вал ай, куке соос нуизы Удмурт писательёслэн союззылэсь юбилейзэ. Кельшиз концертлэн нырысетӥ люкетэз, кудаз ӵошатскисьёс быдэсак быгатӥзы возьматыны асьсэзыс, котькудӥз паймытӥз аслаз аспӧртэмлыко луэменыз но кельшиз кылзӥсьёслы. Нырысетӥез нылаш Яна Пушина сцена вылэ потэм бераз ик туж паймытӥз аслаз ненег куараеныз, сюлме пырымон кырӟаз. Мон соку ик малпай, нырысетӥез сыӵе чебер кырӟа ке, азьпалан мар вите на меда, нош отын одӥгез бӧрсьы мукетыз ялан паймытылӥз(!), кулэ луись ик та проект, одно ик азьланьтоно сое.

Кыкетӥ люкетаз кыльытэк но ярасал ни вал, дыр, угось таяз ӵошатскисьёс наставникенызы кырӟазы, ӧз быгатэ соос татын асьсэзыс возьматыны, одӥгез-кыкез гинэ, угось кырӟанъёс быръемын вал чик но тупасьтэм конкурсантъёслы, куддыръя дышетӥсьсылэн куараез согылӥз егит кырӟасьлэсь куаразэ, вал наоборот но. Кинлы ке огшоры Анна Плотниковаен, кылсярысь, потоно вал, солы быдэс зал мед чабоз шуыса. Оглом ачиз ужрад мыным кельшиз, кельшизы асьсэос ӵошатскисьёс, сыӵе соос висъясько ог-огзылэсь, сыӵе аспӧртэмлыкоесь, кырӟаны манеръёссы ваньзылэн мукет, медам ыше вал соос, та ӵошатсконэн гинэ асьсэзыс эскерыса, мед азьланьтозы вал кырӟан сюрессэс. Удмурт ужрадъёсты, концертъёсты дасясьёс доры вазиськем потэ вал, мед ӧтчасалзы соосыз, угось та ӵошатсконэ пыриськисьёс сыӵе выль тулкым вайысалзы удмурт эстрадае, кудзэ огшоры кылзӥсьёс та дырлы туж возьмало ни. 

"Выль куара - 2014" ӵошатсконын вормисе потӥзы:

1 инты - Татьяна Окорокова (Сарапулысь);

2 инты - Ксения Ахметханова (Башкортотсанысь Янаул ёросысь);

3 инты - Яна Пушина (Дэри ёросысь Подшивал гуртысь).

Таиз ужрад бырем бӧрсьы, ми апаеным эшшо малпаськом на вал ик Шундэктонэ но мыныны на эшшо, озьы ке но жадемынэсь вал ини но сютэмесь, таӵе дыръя позыръяськон сярысь гинэ малпаськы на)) 

Нош мар малпа та ужрадъёс сярысь огшоры калык?

Верало, что “Палэзян” таяз аре урод ортчиз.

Верало, что ведущийёслэн концертэз нуэмзы алама вал. 

Верало, что “Выль куара” проектын интыос умойтэм сётъямын вал.

Верало, что “Шундэктон” “Палэзянлэсь” трос поллы умойгес вал шуыса.

Мар шуод, котьку тунсыко кылзыны калыклэсь малпанъёссэс но тодыны мылкыдзэс)

"Палэзян корка Плюс"

Беромисько, уг вуттӥськы номыр карыса, нош дыр туж чаляк мынэ, мон даже валаса но ӧй вутты кадь, кызьы сӥзьыл шуак толэн воштӥськиз. Таӵе шуак амалэн ортчыны кулэ вал ни мынам быдэс арняе, тужгес но удмуртарняысен арнянуналозь, угось соку пӧртэм удмурт ужрадъёс одӥгез бӧрсьы мукетыз ортчылыны кулэ вал. 

Нырысь ик мон шӧдтэк шорысь апае ӧтемен мыноно луи Эшъяськон юртэ ”Палэзян корка Плюс” нимаськись ужрадэ, мон понна со кыӵе ке аспӧртэмлыко удмурт флэшмоб выллем потӥз)) Пыронэз Ӧтёнъёсъя гинэ вал бере, оло кин ке лыктытэк но кылиз. Мон таӵе ужрадэ нырысьсэ лыктӥ бере, мыным ваньмыз тунсыко потӥз вал, котя со азьын учкыса вуи ик вал, кызьыгес со кылем арын ортчиз вал шуыса. Таязаз трос калык ӧй вал, со оло умойлы но вал, угось интыез ӧжыт. Шумпоттӥзы удмурт блогершаосмы, кудъёсыз озьы ик пӧртэм калык эктонъёслы дышетскыны лыктӥллям. Туж мусо адскиз Маша Векшина туганэныз, Луша Шихова Шкляев Олёшеныз, Гриша Григорьев аслаз нылашеныз, соос шоры туж шумпотымон вал учкыны, угось татын мон нырысьсэ адӟи удмурт активистъёсмес тужгес но шудоен, адӟоно вал соослэсь ымныръёссэс эктыкузы! Андрей Прокопьев модератор выллем ялан одӥгез бӧрсьы мукетсэ эктонъёслэсь нимъёссэс шараялляз, туж капчиен возьматъялляз милемлы, кызьы эктоно со я та эктонэз, милемлы со Гуру удмуртских танцевлы сямен эктыны, эшшо ой кӧня дышетсконо на, ярам арысь аре таӵе эктонъёсъя мастер-класс азьланьтӥськиз ке, дышом ик ай, дыр, малпасько) Кылем арын сямен Наташа Образцова но аслаз картэныз но пиналэныз лыктэмын вал, пиналыз пичи на ке но, ялан эктыны куриськылӥз. Туж мыным яразы Болгариысь лыктэм эктӥсьёс, вот соос эктӥзы ке, эктӥзы ини! Нош кыӵе чебер соослэн костюмъёссы вал, синмаськыса бырод. Кылем арын Палэзянысен поръёсты ӧй ни яраты вал, нош таяз аре соос воштӥзы ик умойтэм малпанме соос сярысь…уг тодӥськы кемалы меда.

Оглом та ужрад ваньзылы яраз кадь, ваньзы туж тыршизы, сюлэмзэс поныса ик эктӥзы, мыным аслым но туж яраз, ӝожгес ик луиз, пичи дыръям удмурт эктонъёсъя кружокамы ӧй ветлы шуыса, троссэ ыштӥ кадь потӥз. Та угось кыӵе ке огшоры позыръяськон ӧвӧл, трос аръёс ортчем ини ӵыжы-выжыосмылэсь аспӧртэмлыко салам.

Та ужрад бырем бӧрсьы, ми Чипчирганысь нылъёсын пиццерие вамыштӥм на. Туж шумпотӥ кык Лиляосынызы матысьгес тодматскемелы, угось Таняез Тихонова но Ленаез Базилевских мон тодӥсько ни вал. Лиляез Леонтьева, инстаграмез ӧвӧл шуыса, куаретӥ на, туж кельше мыным со, сыӵе капчи сямо нылаш, котьку вазиськись, валась) Нош кыӵе та Чипчирганысь нылъёс чебер кырӟало, паймемысь уг дугдӥськы, туж кельшо мыным соос, крезьгуртэк но кырӟанъёссы сыӵе крезьгуроесь кылӥсько, муресь. Аксакшурысь кыӵе ке удмуртэз тодӥсь воргорон кырӟамзэс кылыса, туж паймиз но шумпотэмзэ вераз на. Мукетыз ӟуч воргорон юаз, кызьы кырӟанзы нимаське шуыса, оглом туж тунсыко вал, ваньмыз удалтӥз кадь, куазен гинэ ӧзгес)

Мар? Кытын? Ку?

"Мар? Кытын? Ку?” - тазьы нимаськиз таяз аре ШУД.COM проект улсын ортчем шудон. Нимыз та шудонлэн ӟучысь берыктэмын бере, юанъёсыз сыӵе ик мынӥсь последовательностен луыны кулэ кадь вал, нокинлы кыӵе ке бодыос питран улэ тырыны кулэ ӧвӧл кадь, ваньмыз шонер, озьы ке но произношение ласянь, та юанъёс удмурт сямен чик но чебер уг кылӥсько, соосты секыт озьы вераны. Соин ик тросэз, номыр шоры учкытэк, асьсэ сямен “Кытын? Ку? Мар?” гинэ шуылӥзы, инстаграмысь но таӵе хэштеген быгатоды шедьтыны тунсыко туспуктэмъёсты ортчем шудонысь.

Мон, кылсярысь, кылем арын ортчем шудоназы ӧй ветлы, соин таяз аре мыноно кариськи, угось татын мынам тодмоосы но эшъёсы командаослы люкиськылыса, шудонэ куриськонъёссэс келяллям, озьы ик Настя Тутаева но эшшо нимысьтыз монэ ӧтем кариз на, жаляса верано ачиз лыктыны ӧз быгат шуыса, трос, пе, кужым та ужрадэ понэмын вал, мар бен, юнме ӧй вал гинэ шуыны кыле на, угось тросэзлы та йырез малпаськытӥсь шудон кельшиз. Азьланьтоно, иське. Интыез гинэ укыр сыӵе официальной потӥз, зэмзэ но, “Что? Где? Когда?” передачае вуылэм кадь) 

Кызьы мон Эшъяськон юртэ вуи, эн но юалэ, мед со милям Сергееваен щекретмы луоз;) Паймытӥз монэ Марина, солэсь умой журналист пӧрмысал вал, дыр, угось со сыӵе пичильтык детальёсты тодэ, кудъёссэ милемлы параосын йыре пыртыны выро. Малпасько, блогзэ нуэмез сое кыдатӥз ик та ласянь, практика, милям ке, параосын теория.

Эшъяськон юртэ вуыкумы ини, аспӧртэмлыко паролен, пе, ай эшшо пыроно. Ярам, малпасько, таӵе “секыт” паролен, нокин мултэсэз охранник дортӥ кошкыны уз быгаты)) Парользэс уг гожты, а то мукет ужрадзылы мукет малпано луоз на а то))  

Со кабинетазы пырыкумы, ваньзы Маринаез адӟыса туж шумпотӥзы кадь, ӟигыръяськыны кутскизы. 5-7 минут ортчыса гинэ, монэ синйылтӥзы кадь) тумошоесь, юн мӧзмиллям ог-огзылэсь ни вылэм)

Оглом та шудонын 5 пыриськем командаос пӧлысь, 4 гинэ шудӥз. Италмасъёс вуиллямтэ.

image 

               “Арт-экспедиция”

image

               "Гердикъёс"

image

             "Кучыранъёс"

image

                ”Писейёс”

Шудон ачиз 3 этапен ортчиз. Нырысетӥяз командаослы сётӥськизы пӧртэм юанъёсын билетъёс, котькудӥз быгатэ вал ачиз бырйыны со билетэз, озьы ке но юанзэ учкыны Герман Волковлэн сигналэзъя “Дыр мынӥз” гинэ луэ вал. Котькудӥз команда мур малпаськонэ выйыса, юанъёслы валэктон сётыны выриз, сыӵе вакытэ кутлэн лобамез но, дыр, кылӥськысал, Эшъяськон юртын ке, Влад Степановлэн фотоаппаратэз гинэ куддыръя кыӵе ке куараос сёткалляз. Видеоысь адӟыны быгатоды кызьыгес ортчиз быдэс ужрад. Кыкетӥ этапын командаослы юанъёс сёткалляз ачиз Ольга Тронина, нош юанъёсызлы шонер валэктонъёс кыллё ни вал “сьӧд коробкаын”. Тӥ адӟе вал вормисьёслэсь шудо ымныръёссэс, куке соос асьсэос со коробкаез усьтыса, адӟылӥзы, сётэм валэктонзы шонер шуыса. Шумпотонзы кык поллы бадӟыма вал кадь) Куинетӥ этапын учконо вал видеогожтосэз, кудаз озьы ик кыӵе ке юан сётӥське вал. Тросэзлы кельшиз Алина Крестьяниновалэн юанэз, со понна сое али вите “Палэзянэ” билет!) Выныз талы туж шумпотӥз) Видеоос пӧлысь мыным, кылсярысь, эшшо Богданлэн юанэз кельшиз на, угось солы эшшо нокин шонер валэктон сётыны ӧз быгат. Ачиз Эшъяськон юртэ лыктэмын вал бере, валэктонзэ но ачиз вераз ини. Татчы вань лэсьтэм видеосме куштэм уг луы, соин ик контактысьтым утчалэ, тунсыко ке)) 

image

               ВОРМИСЬЁС!!!

Шӧдтэк шорысь та шудонын, аспӧртэмлыко ӵошатсконын вормисе потӥзы “Кучыранъёс” нимо ФУдФ-ысь 2-тӥ курсын дышетскись студентъёс асьсэлэн командаенызы. Мон, зэмзэ ке, соос понна сюлмысь ик шумпотӥ, малпасько, та вормонзы соосты кӧня ке ке но одӥг интыысьтызы вырӟытоз, бурдъялоз выль вормонъёслы. Соослэн кузьымзы - тӧдьы конвертэ понэм 500 манет. Бертыкумы вормисьёс ваньзы ӵош пиццерие мыныны вераськизы, оглом нуналзы удалтӥз) Ӟечкыласько на эшшо огпол тӥледыз, фуфикъёс!)

Удмуртпуксён 30.09.14

Одӥг арня ортчиз ини, озьы ке но потэ ик гожтэм Алексей Арзамасовлэн 30-тӥ куарусёнэ арт-пространство “Сахар”-ын ортчем кыкетӥ лекциез сярысь. Таязаз темаез “Взгляд на Восток. Какие языки изучать удмуртам?” нимаськиз. Но нырысьсэ ӧжытак предыстория. 

УдГУ палысен автобусэ Таня Тихоноваен пукси вал ай, малпай, та одно ик “Сахаре” мынэ, дыр, шуыса, ӧвӧл ай, пе, кӧтӝож сыӵе. Малы ке но йырам кылем лекциысь блогиняос но Богдан Анфиногенов лыктӥзы вал, малпасько, кӧтӝож со, Таня уг мыны шуыса, адӟиськысал коть эшъёсыныз. А то юа лекция сярысь, нош мон кӧсытгес кылын ваньзэ валэктӥсько, умойгес ук аслыд ас синмыныд одӥг пол ваньзэ адӟыны, сю пол кылзытозь. Но татын малы ке ачим “Сахаре” вуыса, кӧня ке абдрай. Нырысь малпай вал, вазьгес вуи ик шуыса, соин таосыд ӧз на лыктэ, дыр. Бергес но ӧз лыктэ. Кышкай ни вал калыкез укыр ӧжыт шуыса. Но татын Ижкарысь 9-тӥ номеро школаысь вуиллям бадӟым классъёсысь дышетскисьёс, контактын соослэн группазы но вань, нимаське “Пресс-центр МБОУ “СОШ №9” “Подросток и пресса”“. Тани таос Арзами Очейлэсь нырысь интервью басьтӥзы вал ай, собере лекцие но кылизы, ӟечокъёс сыӵе дак. Ачиз лекциез нуись но тае пусйытэк ӧз кельты, шуиз, лекцилэн темаез воштӥськиз но, кылзӥсьёс но шуак воштӥськизы шуыса. 

Лекция, зэмзэ но, тунсыко вал. Арзами Очей вералляз, кыӵе кылъёс удмурт кылмылы матынгес шуыса фонетика яке грамматика ласянь но кудъёсыз кыдёкынгес. 

Оглом таӵе суред кылдӥз. Нырысетӥ интыын - турок кыл, кыкетӥяз - малай, куинетӥ интыын - япон кыл, угось со тужгес но секыт сётӥське валан понна.

Та турок кылэз басьтыны ке, со вылын ог 100 миллион калык вераське, пе. Монэ паймытӥз таӵе зэмлык, Турциын, пе, та дырлы дасясько кык кыллюкамъёс: нырысетӥез - турецко-марийский, кыкетӥез - турецко-удмуртский. Угось та турок кыл тужгес матын луэ удмуртэзлы, куд-ог кылъёс воксё но одӥг кадьгес кылӥсько. Куке но тае тодыса, турокъёс удмурт университетэнымы матысь кусып возьыны туртто вал, пе, озьы ке но асьмелэн малэсь ке но кышкаллям. Ярам коть бурдъяськем мылкыдзы удмурт кылэн тодматскыны но дышетыны куашкамтэ коть, та дырлы кыллюкам дасяське бере.    

Малай кылэз басьтыны ке, таиз вылын вераське 300 миллион калык. Та кыл удмуртэзлы фонетика ласянь матын луэ. Мукет учыр япон кылэн, угось таиз кыл грамматика ласянь удмуртэныз тупа. Соин удмурт кылэз тодӥсь адямилы тужгес но капчигес луоз, кылсярысь, дышетыны та кылъёсты, со ик ӟучъёсын ӵошатыса. Озьы ке но Арзами Очей озьы ик мукет пӧртэм шунды ӝужан палъёсысь кылъёсты милемлы дышетыны дэмлаз на. Кылсярысь, перси,фарси, хинди, тагал, гавай кылъёсты, озьы ик араб кылэз, кудӥныз милям вань одӥг кадесь кылъёсмы. Тунсыко малпанзэ вераз на тодосчи, дэмлаз на дышетыны эшшо узбек, кыргыз, азербайджан но туркмен кылъёсты, угось асьме палъёсын та кылъёсын вераськись муртъёс берло дыре тросгес но тросгес луо. Озьыен, калык но та кылъёсын вераськись будэ.

Дуннеысь тодосчиос, пе, вуиллям сыӵе малпанэ, адями ӵош 5 пӧртэм кылъёсты дышетыны быгатэ шуыса. Ачиз Арзами Очей трос кылъёсты дышетэмын бере, аслаз тодэмысьтыз вераз, со 3 пӧртэм кылъёсты гинэ ӵош дышетылӥз шуыса, куиньлэсь тросгес ке, пе, йыр сураськын кутске ни. Со шуиз на, аслыд куинь кыл бырйиськод ке, соос пӧлын кулэ ӧвӧл луыны япон, китай яке корей кылъёс, угось соос туж секытэн сётӥсько, трос дыр кошке соосты валан понна. Соин ик бырйиськод ке кудзэ ке соос пӧлысь, дышеты огназэ.  

Тӥни сыӵе тунсыко лекция вал, ми но, ачиз Дарали но, кудӥз ваньзэ кылзыса милемын пукиз, сыӵе малпанэ вуим кадь: пӧртэм кылъёсты дышетэммы потыны кутскиз. Зэмзэ но, мукет кылэз тодон тонэ пушласянь узыргес каре, вылласянь но узырмытэ, угось пӧртэм кылъёсты тодӥсь мурт та дырлы пӧртэм интыосын туж кулэ луись адями луэ, озьыен, ужтэк ноку уд кыльы. 

5-тӥ коньывуонэ ТРК “Петровский”-ын ортчиз тунсыко эктонъя чемпионат, кудӥз ортчиз KALASHNYKOV-проект улсын.

 

Туж аспӧртэмлыко пӧрмиз та ӵошатскон. Со мынӥз 7 час. Монэ татчы ӧтиз эше, куке адӟиз, “Танцы” проектэз учкылӥсько шуыса. Мон валамон ни, талы соглаш луи. Озьы ке но ми ТЦ-е вуим бергес, ялан вормисьёс шоры гинэ учкыны ини, быдэс нуналэз татчы быдтэм ӧз пот. Ми дыръя эктӥсьёс жадемынэсь вал ини шуыса, шӧдскиз. Озьы ке но пумозяз ик котькудӥз тыршиз ассэ умоен возьматыны, пӧртэм движениосын калыкез паймытыны, оглом со вал импровизация.

Эктӥсьёсты эскериз 3 адямилэсь быръем жюри, ведущиез но вал тунсыко пияш, кудӥз перерыв дыръя ачиз но ялан ӝутскем мылкыдын пӧртэм сямен позыръяськиз. Асьсэос жюриос но пукыкузы, ялан пыдынызы, киынызы яке воксё но йырынызы пӧртэм сямен выретӥзы, адске, быръем ужзы кельше шуыса) Но мыным потӥз, интызы соослэн укыр пичи вал шуыса. Зэмзэ ке, тазьы ӵошатыны ке со ик “Танцы” проектэз, кыӵеесь отчы лыктылэмын эктӥсьёс но “Петровский”-ысь, соку ик валамон кыкетӥосыз лябесь ай шуыса, вань 2-3 адямиос, кудъёсыз, шуом, висъясько мукетъёсызлэсь, но мон ӧй шуысал, трослы шуыса. Оглом тунсыко вал та ӵошатскон шоры учкыны, ваньзэ аслад синмыныд адӟыны, ноку но таӵе выллем баттлъёсын ӧй на вал. Телевизорысь гинэ адӟылэме вань. Эшшо мон яратӥсько на таӵе эктонъёслы сӥзем киноосты учкылыны, кылсярысь, “Шаг вперёд”-лэсь вань частьёссэ, “Сделай шаг” но мукет. Тунсыко, кырӟась адямиез шудтэм адями шуо, нош эктӥсьсэ кызьы шуо меда? Соос но туж аспӧртэмлыкоесь ук, котькудӥз мон шуысал…

 Та ӵошатсконын вормисьёслы сётӥськоз, пе, луонлык Санкт-Петербурге калыккуспо чемпионатэ вуылыны, кудӥз ортчоз ини шуркынмонэ. Оскисько, соос асьсэзыс отын умоен возьматозы шуыса, мар ке но выльзэ басьтозы. Мылкыдзы гинэ мед тырмоз.

Эшеным бертыны потэммы бӧрсьы ини, автобус дугдылон интыын сылыкумы, син азямы кыӵе ке пӧртмаськись корка сюриз, асьтэос учке)

 

Ярам, дорозямы умой вуим кадь)      

Кемалась ӧвӧл одӥг мусо нылаш @sinazyam мыным асэныз малпам #wantwatermelonchallenge нимо эстафетазэ келяз вал, кудӥзъя кулэ вал арбузэн туспуктӥськыса, туспуктэмез татчы куштыны, так вот, @sinazyam , мон малпандэ быдэстӥ) Озьы ке но та огшоры уж медам луы шуыса, вазиськеме потэ тӥледлы таӵе малпанэн: ойдолэ котькудӥз, кин пыриське та акцие, удмурт мультикъёслы сямен, люкалом уксё, кудӥз мыноз Богдан Анфиногеновлэсь кылбуръёсыныз бичетсэ поттонлы. Соглаш-а?? Эстафетаме келясько @alina_krestyaninova, @udmurto4ka но @mari zarni лы) Оскисько, кутскем ужмес азьланьтоды шуыса)

Кемалась ӧвӧл одӥг мусо нылаш @sinazyam мыным асэныз малпам #wantwatermelonchallenge нимо эстафетазэ келяз вал, кудӥзъя кулэ вал арбузэн туспуктӥськыса, туспуктэмез татчы куштыны, так вот, @sinazyam , мон малпандэ быдэстӥ) Озьы ке но та огшоры уж медам луы шуыса, вазиськеме потэ тӥледлы таӵе малпанэн: ойдолэ котькудӥз, кин пыриське та акцие, удмурт мультикъёслы сямен, люкалом уксё, кудӥз мыноз Богдан Анфиногеновлэсь кылбуръёсыныз бичетсэ поттонлы. Соглаш-а?? Эстафетаме келясько @alina_krestyaninova, @udmurto4ka но @mari zarni лы) Оскисько, кутскем ужмес азьланьтоды шуыса)

                               Тунсыко пумиськон

Туннэ Национальной библиотекаын ортчиз тунсыко “От пьесы до спектакля” нимаськись пумиськон. Калык трос люкаськемын вал, малы мон туж пайми, беромыса лыктӥ ке но, кутсконаз вуи. Туж шумпотӥ, удмурт филологъёсты адӟыса, быдэс курсъёсынызы вуиллям кадь потӥз. Нырысетӥ рядъёсын пукизы асьсэос актёръёс но удмурт критикъёс. Туж тунсыко вал адӟыны тодмо ымныръёсты актёръёс пушкысь, угось тросэз “Шундыкарын” вожатой луыса ужазы вал ай. Лёша Котковен гожтэм гимн-кырӟанзэс гитара шудэм улсын быдэстӥзы на. Кельше мыным та кырӟанзы, ас поннам но куддыръя нёжъяса ветлылӥсько, тумошо)

image

Нырысь ик вераськон та пумиськонын мыныны кутскиз оглом удмурт драматургия сярысь, бӧрысяз Анатолий Григорьевлэн творчествоез сярысь, кылсярысь, Татьяна Зайцева туж ӝот-ӝот эскериз та удмурт драматургмылэсь сцена вылын пуктэм спектакльёссэ, тунсыко лыдпусэн но тодматӥз, “Лысву сямен уг тӧлӟы синкыли” спектакль, пе, сцена вылын 230 пол возьматэмын вал, “Атас Гири” - 250 пол, адӟиськоды кыӵе ке тенденция мынэ кадь, лыдпус бадӟыма но бадӟыма, табере эскероно на кӧня пол “Эмезь кисьмакузэ” возьматозы)

image

Ачиз драматург ӝожтӥське, 2 ар куспын 5 выль удмурт спектакльёс гинэ пуктэмын вал шуыса. “Нет хорошего режиссёра, нет драматургии, нет спектакля”, - шуэ Анатолий Григорьев, озьы ик вань. Коть и кызьы вераз Вера Пантелеева, быдэс историез басьтыса, драматургъёс нокуно трос ӧй вал шуыса, асьмелэсь учкыны ке, милям сыӵе адямиосмы туж ӧжыт. Малы ке но егитъёсыз актёръёс пӧлысь но нокин мылкыд ӧз кары, режиссёре дышетскыны мыныны.

Та пумиськонын актёръёсмы понна ӝожмыт но луылӥз, угось удмурт нылкышно критикъёсмы туж пӧртэм юанъёсын абдратылӥзы ик егитъёсты. Укыр трос юанъёссы кылдӥллям ни вылэм, вылды, тросэз, зэмзэ ке, юанъёссы воксё мукет, вылӥынгес ужасьёслы малпамын вал кадь. Вал юанъёс режиссёръёс сярысь, ӟучъёсыз но удмуртъёсыз, вал сыӵе но, кызьы актёръёсмы диалектъёссылэсь куштӥськыса, зэмос удмурт литературной кылын сцена вылын вераськыны дышизы, ӟучен вераськыкузы удмурт акцентсы потэ-а, уг-а, но наоборот, оглом туж пӧртэмесь, куддыръя серемесь но юанъёс кадь висказы сюрылӥзы. Татын видеоысь как раз адӟоды Лёша Котковлэсь удмурт скороговорка интые, серем ньыльчуръем кылбурзэ лыдӟемзэ.

image

Вера Пантелеева, туж тунсыко юан сётӥз на вал, вань-а та актёръёслэн кыӵе ке яратоно кинозы, кудзэ учкемзы бере соос, кылсярысь, оло синвуаськизы но шуыса. Талы котькудӥз аслэсьтыз валэктонзэ сётыны кулэ вал. Озьы ке но та юанэз дилетантской но шуизы малы ке, уг тодӥськы малы. Актёръёс ваньзы одӥг сямен кутскизы вераны, соос профессионалистъёс кадь, киноез кадръёслы люкылыса кадь учко шуыса, кылсярысь, кызьы одӥгез актёр шудӥз, кызьы мукетыз, кызьы тыл шудӥсьёс вылэ усе но мукет.

image

Ярам коть Сергей Наговицын валэктоно кариськиз ик: ” Есть профессиональный взгляд и ещё эмоциональный ряд”. Озьыен, огшоры учкись кадь, пе, ми тоже киноосты, спектакльёсты учкиськом. Ярам, иське, а то мон кышканы кутски ни вал со пафосной профессионализмзы вылэ пыкиськыса, тужгес но кулэзэ адӟыны уз быгатэ шуыса.    

image

Оглом та пумиськон шуныт ке но вал, вераськон туж ӟырдыт мынӥз кадь. Пумаз актёръёс воксё но жадьыса быризы шуыса, шӧдскиз, таӵе шӧдтэк шорысь соос вылэ усем кыӵе ке негативлэсь. Мон азяз пуки бере, быдэсак со вачевераськон ӧразы выйылӥ кадь, куке ини пумиськонэ лыктэмъёсты туспуктӥськыны ӧтизы, соку гинэ сайкай кадь, берам учки, нош отын туж трос калык пуке на вылэм, тунсыко, кыӵе синъёсын соос учкизы та ужрад шоры.  

 Туала Fest - 2014

26-тӥ куарусёнэ филармониын ортчиз Туала Fest нимо финн-угор крезьгуръя фестиваль, кудаз мон одно ик ветлыны кулэ вал, угось отын мынам яратоно Светӥ Ручкинае Silent woo goore группаеныз фестивалез усьтыны кулэ вал. Туж шумпотӥсько татчы мынонлы мыным пумит номыр но ӧй вал шуыса. Калыкез филармониын, зэмзэ ке, туж ӧжыт вал, маин со герӟаськемын, валантэм. Шумпоттӥзы ведущийёс Натӥ Ушакова но Анатоль Галиханов, коть кӧня ке пафосностез Галихановлэн шӧдӥське ик вал. Ярам концертэз нуисьёс кема учкисьёсты вераськонъёсынызы ӧз ӝегатэ, сцена вылын, адскизы тодмо ымныръёс. Светӥ Ручкина нош ик паймытӥз аслаз зол вокалэныз, чебер горд дэременыз но инсьӧры вуттылыны быгатэменыз. Туж кельше солэн “Толэзе” нимо кырӟанэз, кельше, кызьы со сое куаразэ вошъяса кырӟаны быгатэ, со одӥг кырӟанэз, кудӥз дыръя мынам мугоры ӟазег вылтырен шобырскиз, котя мон та кырӟанэз 2-тӥ пол кылзӥ ке но ини, концертъёсы ветлыса. Аспӧртэмлыко “Сиротская” кырӟанэз, малы ке но сое кырӟакуз, мынам йырам лыктӥз “Бригада” сериалысь “Я начал жизнь в трущёбах городских” кырӟан, тунсыко кадь. Кырӟан амалыз Ручкиналэн тунсыко, сцена вылын аспӧртэмлыко перформансъёсызлы туфлиосыз гинэ мешатьто кадь вал, ярам татын со сцена вылын ик туфлиоссэ кыльыны но быгатэ вал, нош симфони оркестрен концертсэс тодэ вайыны ке, отын кыӵе ке этикет ини, отысь выступлениосыз сдержанноесьгес вал. Сайлентъёс озьы ик выль кырӟанэнызы тодматӥзы на, уг вера, со кыӵе ке хит шуыса, огшорыгес, мыным эшшо потӥз на ыльнагес шуыса.

   Шаркан трикотаж коллекция

Silent woo goore бӧрсьы, Mademoiselle oudmourte агенствоысь нылъёс возьматӥзы Зоя Лебедева, Альбина Николаева но Полина Кубиста дизайнеръёслэсь коллекциоссэс, аспӧртэмлыко коллекциязэс возьматӥз на Шаркан трикотаж. Со бӧрсьы концертэз нуисьёс 10 минутъем антракт сярысь ивортӥзы, мон талы туж паймемын вал, мар луоз на азьланяз. Озьы ке но мон пумозяз ӧй ни ул, кошконо ни вал.

  Дарина Якимова - удмурт модали, “Эль ныл - 2014”

 "Mademoiselle oudmourte" агенствоысь модалиос

Азям жадем модалиос сюризы на, жадемынэсь ке но, чебересь но шудоесь. Туспуктоно кожай) Тутаева, эн ӝожтӥськы, тон яркыт помадатэк но туж чебер) Кылем арын мон та нылъёсын Дарали доры ветлыны кутски вал ай, соин тросэныз тодмо, шумпотӥсько Настя Тутаеваен но Ирина Игнатьеваен тодматски шуыса, нылъёс та дырлы котькудӥз модельёс кадь луэмын ни ке но, соос сыӵе ик вазиськисесь кылемын, йырзы выллань ӝутскемын ӧвӧл, со понна сюлэм шумпотэ, нош йырвизь данъяське та нылъёсын. Дарали бадӟым ӟечок ик всё-таки, паймисько солэн аспӧртэмлыко малпанъёсызлы но кыӵе ке пиосмурт кужымезлы, вань малпанъёссэ улонэ пыӵатыны турттэмезлы но быгатэмезлы.

Эгралан литературалы но искусстволы сӥзем ужрад ортчем бере, ЦУКе (Центр Удмуртской Культурыязы) вуылон.